Nani anasema kweli kuhusu Kigamboni?

26 Sep 2012 RAIA MWEMA
RAIS Jakaya Kikwete amekanusha kutouza ardhi ya Kigamboni kwa George Bush. Sawa, lakini hajakanusha kuuzwa kwa eneo la Kigamboni. Kama halijauzwa kwa Bush basi tuambiwe limeuzwa kwa nani.

Habari hii ya Kigamboni inarejesha suala la Richmond: nani alijua na nani alitaka kuchukua hatua kuzuia mkataba ule usiingiwe.

Leo tunapoambiwa habari ya Kigamboni mradi wa mji mpya uliojaa ubabe na usiri mkubwa tunapata tabu sana kuamini kauli hizi.

Mambo haya yanauma sana kwa wahanga wa zoezi hilo la mradi wa mji mpya Kigamboni. Sisi Kigamboni tunajua tumeuzwa lakini pengine hatuna uhakika tumeuzwa na nani na kwa nani. Mawakala wengi wanapitapita kurubuni wananchi waukubali mradi, tena wengine ni viongozi.

Madiwani wa Kata za Tungi, Vijibweni, Kigamboni-Ferry na Mjimwema wana mahusiano mabaya sana na wananchi wao tangu siku ile walipoonekana kwenye runinga bungeni Dodoma. Wanatuhumiwa kuendesha uwakala wa uuzaji wa Kigamboni. Wapo wengine pia wakijinadi kama wawekezaji wa upanuzi wa bandari, wajenzi wa kiwanda cha samaki, wawekezaji wa mafuta, kuna watoto wa vigogo pia wanarandaranda huku wakitumia majina ya wazazi wao, nk.

Hatua ya kutimuliwa kwa Mbunge wa Kigamboni kwenye Bunge iliwafanya wakazi wa Kigamboni kuamini kuna jambo linaendelea kuhusiana na suala zima la utwaaji wa ardhi ya Kigamboni.

Wananchi hao wa Kigamboni walimtuma Mbunge wao akaukatae mradi wa mji mpya wa Kigamboni bungeni kutokana na kugubikwa na utata, usiri na ubabe. Kitendo cha kumtimua Mheshimiwa Faustine Ndungulile bungeni kilionyesha juhudi za kumshona mdomo na hivyo kuhalalisha dhuluma dhidi ya wakazi wa Kigamboni.

Kama hiyo haitoshi, wakazi wa Kigamboni tuliandaa mkutano mkubwa wa mapokezi ya Mbunge wetu pale uwanja maarufu wa Machava. Walihudhuria wananchi kutoka Pembamnazi, Yaleyale Puna, Kimbiji, Kibugumo, Mwongozo, Gezaulole, Chekeni Mwasonga, Tundwi Songani, Mikwambe, Kibada, Kisarawe II, Mbagala yote hadi Mbande, Chamazi na Mvuti.

Wanachi walikuwa wamechangishana mamilioni ya shilingi kumkabidhi Mbunge huyo kama posho kufidia ile aliyonyimwa kufuatia kutimuliwa bungeni na hivyo kumfanya kukosa posho za vikao. Cha kushangaza sana na kwa masikitiko ya wana-Kigamboni, makaribisho hayo yalisambaratishwa na jeshi la Kamanda Suleiman Kova saa chache kabla ya makaribisho hayo kufanyika.

Lakini kwa mshangao mwingine, kuna viongozi Kigamboni wanapitapita na kujitapa kwamba wao walihusika “kulishawishi” Jeshi la Polisi kusambaratisha makaribisho hayo ya mbunge kwa madai kwamba alikuwa anataka kuwachafulia hali ya hewa kwa kuwahamasisha wananchi kuukataa mradi wa Mji Mpya Kigamboni.

Viongozi hao ni wale mawakala wa mradi ambao wametajwa hapo juu. Hivi katika hali ya kawaida kiongozi wa kata au serikali ya mtaa anapata wapi ujasiri na mamlaka ya kuamrisha Kanda Maalumu bila kuwa na msimamizi huko juu? Hii haiwezi kuingia na kutulia tuli kwenye akili inayofanya kazi maridhawa, vinginevyo itakuwa ni bongolala.

Wakazi wa Kigamboni tumepewa katazo (stop order) la kutoendeleza maeneo yetu tangu Oktoba 2008 kwa hoja kwamba ni eneo la mradi. Ilisemekana kuwa ramani za satellite zilishachukuliwa kubaini kuna nini, wapi, na kwa nani.

Ukweli ni kwamba hakuna mkazi wa Kigamboni aliyeshirikishwa katika zoezi hilo. Na nikiri tu hapa, kwamba hata hicho kilichomo kwenye hiyo ramani hakuna anayejua. Mungu ni mkubwa akatuongoza vema, ramani hiyo maarufu kwa jina la “Kigamboni: The Blue Diamond” ikaonekana kwenye mitandao ya huko kwa George Bush. Ni fafanuzi (documentary) moja inayofanyiwa maelezo (commentary) na mtu mwenye lafudhi ya Kimarekani akisifia kuwa Kigamboni ni lango/kitovu (hub) ya “maendeleo” ya Tanzania. Siwezi kuamini kwamba mwelezaji (commentator) yule ni Mmatengo au Mhaya, na wala si Mndengereko au Mzaramu. Wasamaria wakatuvuta masikio tukaiona hiyo documentary mtandaoni.

Nikueleze tu ndugu msomaji kulikuwa na mwitiko (rush) mkubwa wa kuipata hiyo documentary miongoni mwa sisi wadau wa Kigamboni. Tulikuwa tunanunua hiyo fafanuzi ili kupata taarifa ambayo ni haki yetu kupata lakini wahusika serikalini wakawa wanatuficha. Hata mimi binafsi niliuziwa na msamaria mwema Dar es Salaam na ikawa bidhaa adimu hapa Dodoma.

Hayo ndiyo mazingira yaliyosababisha kujitokeza maneno (uvumi?) kwamba Kigamboni imeuzwa kwa George Bush.

Kwa mshangao wa tulio wengi, mara baada ya nusanusa yao serikalini kugundua kwamba suala hilo liko hadharani kwa haraka sana Wizara ya Ardhi Nyumba na Maendeleo ya Makazi ikatoa kilichoitwa TAMKO LA SERIKALI kwenye gazeti la Mwananchi Jumapili moja ya mwaka 2008 lililokataza uendelezaji wa ardhi katika maeneo ya mradi kwa mujibu wa sheria ya Mipango Miji namba 8 ya mwaka 2007. Katazo hilo lilitakiwa liishie Septemba 2010 ambapo mradi ungekuwa umeanza awamu ya kwanza.

Hadi leo niandikapo makala haya hakuna kinachoendelea ukiachia mbali kuwarudisha nyuma wakazi wa Kigamboni. Tumerudishwa nyuma kwani tunatishwa (intimidated) kwamba chochote tutakachoendeleza kinakula upande wetu. Choo kikianguka usikarabati maana itakula kwako. Na huo wimbo wa fidia kwa mali za watu wa Kigamboni ni nyimbo za kila mwanasiasa asiye makini. Nakumbuka mwanasiasa mmoja aliliambia Bunge la Bajeti kwamba waathirika wa daraja la Kigamboni wameshathaminiwa mali zao hivyo bado malipo tu. Mimi ni mmoja ambaye napitiwa na barabara ya hilo daraja, lakini hadi leo niandikapo makala haya sijathaminiwa kilicho changu.

Halafu anakuja mtu anasema watu wa Kigamboni wamechochewa na wapinzani kupinga ujenzi wa daraja. Nachukia kauli za aina hiyo maana ni za kudhalilishana.

Hivi Kigamboni kuna ma-tabula rasa (wajinga) wanaosubiri wajuaji kutoka upinzani au chama tawala kuja kuwaelekeza cha kufanya? Wote wenye fikra za aina hiyo wanajidanganya na kama walizoea kunadi sera za aina hiyo sehemu nyingine, Kigamboni wameula wa chuya. Wamuulize yule “mwekezaji” wa kiwanda cha samaki pale Vijibweni mwaka 2004 akisaidiwa na kupigiwa debe na aliyekuwa mkuu wa mkoa wakati huo aliishia wapi.

Tulikomaa pale hatukutoka hadi leo tunapitiwa na barabara, nao wakituletea gozi gozi, wembe ni uleule uliomnyoa “mwekezaji” wa kiwanda cha samaki.

Huwezi kusimama bungeni unadanganya umma umethaminisha mali za wananchi pale Vijibweni wakati si kweli, halafu mtu anatarajiwa achekewe chekewe tu. Mtu wa aina hii lazima aitwe kwa jina lake (call a spade a spade) yaani kama ni mwongo basi aitwe hivyo bila kuumauma maneno.

Kama hakuna malipo hakuna barabara kupita pale Vijibweni na wala hatuhitaji mwanasiasa wa upinzani au chama dola kuja kutusemea. Sisi wahanga wa mradi huo tunajua kujisemea wenyewe. Tangu lini funza anikae mimi halafu wewe ndiye uonyeshe wapi funza aliko mwilini mwangu? Hizo ni falsafa zenye mtindio wa mwelekeo.

Badala ya kulaumu wapinzani, Serikali ifanye wajibu wake kuhusu utata wa mji mpya Kigamboni kwa kuwashirkisha wananchi katika hatua zote kama alivyopendekeza Mbunge Ndungulile na kuungwa mkono na wana-Kigamboni.

Kule Kigamboni wakazi wameunda kamati yao ya kufuatitlia maendeleo ya mchakato mzima wa mradi mji mpya. Wameshaongea sana kwenye mikutano ya hadhara, wameongea na waziri, naibu waziri, katibu mkuu na watendaji wengine serikalini na hata NGOs.

Mara nyingi viongozi wa kamati wametokea kwenye runinga mbalimbali. Wafuatiliaji wa vipindi hivi watakumbuka kwamba kamati ilihitimisha kwamba mradi wa Kigamboni ni EPA, Richmond, Dowans, Deep Green, Tangold na miradi mingine ya kifisadi.

Mpaka leo hakuna aliyekanusha na kujenga hoja ya uhalali wa mradi huo.

Halafu si mara moja maofisa kutoka wizarani wameshatimuliwa na wananchi kule Kigamboni lakini hakuna aliyesimama kuwatetea. Mambo (beacons) zilizowekwa na mkandarasi bila wananchi kushirikishwa zimeshang’olewa na wananchi, mbona hawachukuliwa hatua za kisheria kama beacons zile ziliwekwa kihalali?

Kamati imeshatafiti na kugundua kuwapo uvunjaji mkubwa wa sheria za nchi kwa upande wa Serikali katika kutekeleza mradi huo. Hakuna aliyesimama kule serikalini na kutetea utawala wa sheria unavyotumika katika kutekeleza mradi wa mji mpya kule Kigamboni. Ni katika mazingira hayo mbunge wa Kigamboni Faustin Ndungulile alisimama pale bungeni kutoa tamko la wakazi wa Kigamboni kwamba mradi uanze upya kwa kufuata sheria ambazo Bunge limetunga. Akaishia kutimuliwa bungeni kwa sababu ya kutetea haki za watu wa Kigamboni lakini pia kutetea hadhi ya Bunge lenyewe.

Lakini mheshimiwa huyo ni Mbunge wa chama dola si wa upinzani. Kwa mantiki hii hoja ya kusema wapinzani wanapinga mradi wa mji mpya Kigamboni naiona ni dhaifu sana na haina mashiko. Ukweli ni kwamba wananchi wa Kigamboni kwa utashi wetu bila kusukumwa na chama chochote ndio tunaopinga mradi huo unaoendeshwa kinyemela.

Hoja ya kuendeleza Kigamboni kwa faida ya wananchi ni dhaifu na haina mashiko. Kama ukifanikiwa kuziona zile picha (model impessions) za jinsi mji utakavyokuwa nadiriki kusema hapa ni mji ambao wananchi wa Kigamboni hawamo katika makadirio yake. Kule kuna eneo la viwanda, kuna eneo la utalii na burudani, kuna eneo la biashara za kimataifa, kuna eneo la shule na vyuo vya kimataifa na eneo la makazi ni asilimia kama 7% tu hivi. Wengine wamelibatiza eneo hilo la makazi kuwa ni concentration camps.

Majengo yake ni maghorofa yanayofikia 20 hadi 100. Mitaa yake hakuna njia za guta wala mikokoteni. Bustani zake ni za maua si bamia, matembele, viazi wala embe. Nyumba zake si za kupikia kwa kuni wala mkaa, hamna mabanda ya kuku, mbuzi, nguruwe, njiwa wala ng’ombe.

Kwa mazingira hayo wananchi wa Kigamboni itabidi wawapishe wageni na wao wasonge mbele huko Chekeni Mwasonga na Tundwi Songani wanakoweza kulima, kufuga na kuendesha mikokoteni.

Tuache kudanganyana hapa eti kuna mtu ana uchungu na watu wa Kigamboni. La msingi tu watu walipwe vizuri, si kama walivyodhulumiwa wenzetu wa upande wa Kurasini. Serikali iliwalipa shilingi milioni 20 kwa eka yenye wakazi 10 hadi 20. Serikali imeuza maeneo yale baada ya miezi isiyozidi sita kwa wawekezaji kwa shilingi milioni nyingi.

Na wala watu wasitukumbushe yaliyojiri mwaka 2005 kuhusu daraja hilohilo. Juhudi za kuanza ujenzi Oktoba 2005 zilikwamishwa na kwa sababu ambazo hazijawahi kuwekwa wazi. NSSF nadhani wanakumbuka kilichotokea wakati ule licha ya maandalizi yote kuwa yalikuwa yamekamilika.

Tulitangaziwa ya kuwa imepatikana kampuni ya Kichina iliyojenga huko kwao daraja la urefu wa kilomita 30. Watu wakajinadi kwamba Wachina hao wangeweza kutumia muda mfupi sana kujenga daraja la Kigamboni. Lakini mradi uliyeyuka kama theluji kwenye kiangazi.

Walawale waliokwamisha ujenzi wa daraja huko nyuma leo wanatamba hadharani na kudai Dk. Ramadhani Dau apewe nishani ya utendaji bora. Historia ni hakimu makini sana, watu wasifikiri wanaweza kujifanyia watakavyo halafu historia ikawasamehe.

La msingi ni kwamba, kama vile tunavyojinadi kuwa tunafuata utawala wa sheria basi zoezi lile la mji mpya Kigamboni liende kwa kufuata sheria zilizopo. Hiyo ni pamoja na wananchi kushirikishwa kama sheria zinavyotaka. Lakini kwa usiri na ubabe huu unaotawala zoezi zima la mradi wa mji mpya Kigamboni, lazima hoja za kwamba eneo ameuziwa Bush zitaendelea kujitokeza.

Kama si kweli Bush kauziwa eneo la Kigamboni, usiri na ubabe, na hoja ya nguvu badala ya nguvu ya hoja vinatoka wapi? Ukweli (reality) unaiishi independent of the subject, si hoja nani anasema; rangi yake, cheo chake, umri wake nk. Hivyo basi, ukweli kuhusu mazingira yanayozunguka mradi wa Kigamboni kama ilivyokuwa kwa EPA, Richmond, Dowans, Simbion, Tangold, Deep Green na mingine mingi utakuja kujipambanua na hatimaye kujulikana tu.

Ole wao wanaojifanya manabii wa injili hii ya Blue Diamond. Watu wasije kulia na kusaga meno ufunuo utakapofunika sayari hii na hila zao kuwekwa hadharani.