Polisi yawashikilia viongozi wa Uamsho 
 JESHI la Polisi visiwani Zanzibar linawashikilia viongozi watano wa Taasisi za Kiislamu Zanzibar, akiwamo kiongozi wake, Sheikh Farid Hadi Ahmed.
Viongozi hao wako mikononi mwa polisi tangu juzi wakihojiwa kuhusiana na tukio la kutoweka kwa kiongozi huyo ambaye ilidaiwa kuwa alikamatwa na ‘kufichwa’ na polisi kwa siku nne.
Kamishna wa Polisi wa Zanzibar, Mussa Ali Mussa alisema jana kwamba wamewakamata na kuwahoji na watawafikisha mahakamani leo iwapo wataridhika kama wana mashtaka ya kujibu.
Mbali na Sheikh Farid, vigogo wengine ambao wanashikiliwa na polisi ni Mkuu wa Uamsho, Sheikh Mselem Ali Mselem, Naibu wake, Azzan Khalid Hamdan, Mussa Juma na Hassan Bakari.

Uamsho wasisitiza amani
Wakati jeshi hilo likiendelea kuwahoji viongozi hao,  taasisi hiyo imetoa waraka wa kuwataka Waislamu wadumishe amani hasa katika kipindi hiki ambacho viongozi hao wanashikiliwa na jeshi hilo.
Waraka huo uliotolewa jana na kusambazwa katika misikiti mbalimbali kisiwani hapa, umewataka Waislamu wawe watulivu na kuhudhuria kwa wingi mahakamani leo wakiwa na vitambulisho vya Mzanzibari Mkaazi.
Waraka huo unasema: “Kama hali ilivyo na mnavyosikia mnaombwa muwe watulivu na mfanye subira na leo (jana) hapo Msikiti wa Mbuyuni hapatakuwa na muhadhara si Adhuhuri wala Alasiri. Mnachoombwa na viongozi wenu muwe wavumilivu na watulivu hadi kesho (leo), mfike mahakamani bila ya fujo na muchukue kopi (nakala) za vitambulisho vyenu vya Mzanzibari.”
“Jingine ni kuwa msikae vikundi na mkawapa askari sababu, tunasisitiza amani na utulivu na Waislamu ni wenye kutii amri za viongozi wao. Tunasisitiza amani na utulivu, pia subira na dua kwa wingi. Ukipata taarifa hii mjulishe na mwenzio toa nakala na uwape wengine. Wabillah Taufiq.”
Hata hivyo, waraka huo ambao ulikuwa unasambazwa katika misikiti jana haukutiwa saini na kiongozi yeyote wala haukutaja umetolewa na nani.
Wakili wa Uamsho, Salim Tawfik alisema jana kuwa wateja wake watafikishwa mahakamani leo, lakini akalaumu kwamba polisi wamewahoji bila ya yeye kuwapo.
“Mimi nilikwenda polisi nikakuta Mselem anahojiwa nikataka kuingia wakanizuia, wakasema wataniita lakini hawakufanya hivyo,” alisema.
Hali ya Zanzibar kwa sasa imetulia ingawa polisi na askari wa vikosi vya Serikali ya Mapinduzi Zanzibar (SMZ),  wameimarisha ulinzi katika maeneo mbalimbali wakiwa wanazunguka kuhakikisha hali inaendelea kuwa shwari.
Kwa siku tatu mfululizo, Mji wa Zanzibar ulikumbwa na ghasia kubwa kwa askari kupambana na wananchi ambaowalikuwa wakiandamana wakitaka Sheikh Farid aachiwe huru wakidai amekamatwa kwa kificho na polisi jambo ambalo jeshi hilo ililikanusha.
Juzi, kiongozi huyo alijitokeza hadharani na kudai kuwa alichukuliwa na polisi na kumrudisha mahali walipomchukua.